puxu d´asturies

Naguamos güei pola creación d´un sindicatu dafechu nacional, en clave asturiana. Sinón esiste yá, que sía grande. Por un partíu nacional asturianu, y sólo asturianu, que sinón esiste yá, sía bramente asturianu y entós sobraríen coletines como eses d´”asturianista” o “nacionaliegu”. Partíu y sindicatu como dos brazos pa una Asturies Soberana. Soberanía que ye reconocimientu públicu y ensin complexos de la esistencia d´una entidá nacional nomada Asturies dende tiempos terremotos y qu´anguaño quieren esborriar. Naguamos porque toos, obreros, estudiantes y pueblu en xeneral teamos xuníos daveres pa facer frente a tantes y tantes perreríes que mos vienen faciendo, y que sin dulda entren nel tarrén del xenocidiu. Crítica, crítica, y crítica. Nun parar de falar y d´escribir, y de glayar en cais y barricaes. Pero hai que torgar , al empar, que siempres falen los mesmos. Glayemos fasta que tapemos munches boques de víbora: a) Los que falen entá del “Principado” y de les “Alteces”. Dir perehí a rascala con Jaime Peñafiel. Abaxo la Monarquía y abaxo tolos compromisos institucionales pa colos reis y princesos. Nós nun somos principáu de naide, y menos d´unos Borbones. Los cuadonguistes, fíos irredentos del franquismu y del españolismu tradicional. Cuadonga trubiecu del Reinu Ástur, y puntu. Nun somos España, nin bierzu d´ella. Asturies nun ye España, ya inclusu ye incompatible étnica y estructuralmente con España. La nuesa rellación col Estáu, ye otru alderique. Pero yá ta bien d´atentar contra la nuestra hestoria y de robar los nuesos símbolos. Esto va contra los Obiespos Osoros, los Socialistes de la FSA, los estremistes de Gustavo Bueno y de la Fundación Gabiniana, los xuraos glamourosos y fartones de la Fundación de los Premios Príncipe... Tamién va polos Jordi Pujoles, pola “prensa rexonal” y demás coru caspiosu y colonialista que sigue riéndose de nós, dientro y fuera del País. Pocu tiempu queda: ceo vais sintir vergoña de toles vueses fechoríes. Si España nun alcuentra cuna nin fecha d´orixe, peor pa ella. Nun ye problema nuestru, pero dir a engañar a otra parte. c) Los acomplexaos. Ai, vais quedando menos, pero entovía queden. Los que, con munchu rabalbu falen de los “bables”. Los que dicen, contra toa evidencia científica, que nun ye llingua. Que si ye castellano mal falao. La xente mozo, pali que pali, yá va dexavos bien p´atrás. El barríu que´l facismu llogró nel País pelos años 30 va escaecese ún díi o otru. Les xeneraciones camuden, el xerme ta ehí, bien dientro del alma del asturianu. Hai un dieldu d´identidá membruda. Y si hai tantu enfotu por atapalu, ye que lu hai. De mano dícente: “Tas chifláu”, “Yes marxinal”. Pero pasen los años y aveza ser normal sintir eso de “Nación, Llingua, Soberanía....Asturiana”. ye custión de vezu y costume, d´una boluca de ñeve que va rolando, selemente al entamu, achaplante al final. Quieren insultar y esprecetar al primeru que lo diz, al primeru que s´atreve. A la fin, a la fin, yá hai un Pueblu que se concenxa, que lo tien interiorizao, que lo diz al altu la lleva. Fasta que´l grayíu coleutivu aporta a Madril, y entós allá...tendrán que mover ficha tamién. d) Los derrotistes. Ai, esos llarimones d´”asturianistes” acreditaos. Esos que dicen, “IU son los únicos que puen defender...” ¿el qué? Una “llingua n´estinción”, dicen. Un “resurdimientu de nun sé qué”. ¡Tontaes! Falen entovía del asturianu como si fore una momia, como si fuere l´urogayu a piques d´esapaecer... LLINGUA NACIONAL y puntu. Si l´asturianu tien peligru real d´esapaecer ye porque nun ta reconocío como llingua d´una Nación, y esa falta de reconocimientu ye un fechu artificial, como artificial ye la Voluntá Política d´emburrialu y da-y´l puxu que tien mester. Tantos llarimones, tantos llorones dan noxu. Sinón hai concenxa nacional(ista) nun hai concenxa llingüística. Querer dixebrar una de la otra, como faen a nivel teóricu R. D´Andrés, Bello y demás personases non-nacionalistes, nun ye otro que a) facer de caballu de Troya nel alicar nacional, o resinase a ser “dinamizaor cultural” averáu al Poder, igual que tamién los hebía con Franco, escribiendo en bable festivu, cuando pa una boda, cuando pa una fiesta de prao. L´Asturies qu´esconsoña nun tien nada que ver nin colo uno nin colo otro. e) Los símbolos y festexos impuestos. Les señes d´identidá son dialéctiques. Emburriar poles nuestres implica necesariamente´l momentu negativu, el refugar popularmente, masivamente, la Matanza de Toros, les Feries d´Abril, los amosadorios belicistes del exércitu español, la simboloxía foriata ensembre.